Scientists published the photo of corona that attacked the respiratory system

Scientists published the photo of corona that attacked the respiratory system

శ్వాసవ్యవస్థపై దాడిచేసిన కరోనా ఇలా ఉంటుంది.. ఫోటోలను ప్రచురించిన శాస్త్రవేత్తలు

కంటికి కనిపించని ప్రాణాంతక కొత్తరకం కరోనా వైరస్ ఆకారానికి సంబంధించిన తాజా ఫోటోలను శాస్త్రవేత్తలు ప్రచురించారు. మహమ్మారి ఊపిరితిత్తుల్లోకి చేరిన తర్వాత ఏలా ఉంటుందో వెల్లడించారు.

ప్రయోగశాలలో శ్వాసకోశ కణాలకు సోకిన కొత్తరకం కరోనా వైరస్ ఫోటోలను శాస్త్రవేత్తలు రూపొందించారు. ఊపిరితిత్తుల్లో విడుదలయ్యే వైరస్ కణాలపై నార్త్ కరోలినా యూనివర్సిటీ చిల్డ్రన్ రీసెర్చ్ ఇనిస్టిట్యూట్‌కు చెందిన శాస్త్రవేత్తలు పరిశోధన చేపట్టారు. కెమిల్లె ఎహ్రే నేతృత్వంలోని ఈ పరిశోధన సాగింది. వైరస్ ఫోటోలను సంగ్రహించిన శాస్త్రవేత్తలు.. గాలి ద్వారా సార్స్-కోవి-2 ఎలా సంక్రమిస్తుందో సులభంగా అర్థమయ్యేలా వీటికి గ్రాఫిక్స్‌ను కూడా జతచేశారు.

అధికశక్తితో కూడిన సూక్ష్మ కణాలు మానవ శ్వాసకోశ ఉపరితలంపై పెద్ద సంఖ్యలో వైరస్‌ను వ్యాపింపజేయడమేకాదు, ఇతరులకు సంక్రమించడానికి సిద్ధంగా ఉన్నాయి. పరిశోధనలో భాగంగా మానవ ఊపిరితిత్తుల్లోని శ్వాసనాళ ఎపిథీలియల్ కణాలలో కరోనావైరస్‌ను ప్రవేశపెట్టి 96 గంటల తరువాత అత్యంత శక్తివంతమైన స్కానింగ్ ఎలక్ట్రాన్ మైక్రోస్కోప్ సాయంతో పరిశీలించారు.

శ్వాసవ్యవస్థపై దాడిచేసే కరోనా వైరస్ కణాల ఫోటోలను న్యూ ఇంగ్లాండ్ జర్నల్ ఆఫ్ మెడిసిన్‌లో శాస్త్రవేత్తలు ప్రచురించారు. తల వెంట్రుకల మాదిరి తంతువులు శ్లేష్మంతో కూడిన కణాలను పోలీ ఉన్నట్టు శాస్త్రవేత్తలు వర్ణించారు. సిలియా అనేది ఊపిరితిత్తుల నుంచి శ్లేష్మం, చిక్కుకున్న వైరస్‌ను గాలి ద్వారా రవాణా చేసే ఎపిథీలియల్ కణాల ఉపరితలంపై జుట్టు లాంటి నిర్మాణమని శాస్త్రవేత్తలు తెలిపారు. అధిక అయస్కాంత శక్తిని ఉపయోగించిన శాస్త్రవేత్తలు.. మానవ వాయుమార్గ ఎపిథీలియా ద్వారా ఉత్పత్తిచేసిన సార్స్-కోవి-2 నిర్మాణం, సాంద్రతను పరిశీలించారు.

ఈ వైరస్ కణాలు.. అతిథేయ కణాల ద్వారా శ్వాసకోశ ఉపరితలాలపై విడుదలయ్యే వైరస్ పూర్తిరూపమని పరిశోధకులు పేర్కొన్నారు. ఇమేజింగ్ పరిశోధన మానవ శ్వాసకోశ వ్యవస్థలో ప్రతి కణంలో ఉత్పత్తయి, విడుదలయ్యే చాలా ఎక్కువ ఆర్ఎన్ఏలను వివరించడానికి సహాయపడుతుందని వివరించారు. వైరస్ తీవ్రత ఎక్కువగా ఉంటే వ్యక్తిలోని వివిధ అవయవాలకు వ్యాపించడమే కాదు, కోవిడ్-19 ఇతరులకు సంక్రమించడానికి సాధనంగా ఉపయోగపడుతుందని శాస్త్రవేత్తలు వ్యాఖ్యానించారు. వ్యాధి సోకిన వ్యక్తులు మాస్క్‌లు ధరించడం వల్ల సార్స్-కోవి-2 వ్యాప్తిని నియంత్రణకు సహకరిస్తాయని తెలిపారు.