AP-Grama Sachivalayam Result are expected
to be released October ending
ఈ నెలాఖరులో గ్రామ, వార్డు
సచివాలయ పరీక్ష ఫలితాలు..!
గ్రామ, వార్డు సచివాలయ పరీక్షల ఫలితాలను ఈ నెలాఖరులోగా ప్రకటించే అవకాశాలున్నాయి.
ఏపీలో గ్రామ, వార్డు
సచివాలయాల్లో 16,208 ఉద్యోగ ఖాళీల భర్తీ కోసం నిర్వహించిన
రాత పరీక్ష ఫలితాలను ఈ నెలాఖరులోగా ప్రకటించేందుకు అధికారులు ప్రయత్నాలు ముమ్మరం
చేశారు. ఇప్పటికే ఆన్సర్‌ షీట్ల స్కానింగ్, అభ్యర్థుల వారీగా
మార్కుల ప్రక్రియ దాదాపు పూర్తయింది. అయితే వివిధ ప్రభుత్వశాఖల్లో ఒప్పంద, పొరుగుసేవల పద్ధతిలో పని చేస్తూ సచివాలయ ఉద్యోగ పరీక్ష రాసిన వారికి 15 వెయిటేజీ మార్కులివ్వాలని ప్రభుత్వం నిర్ణయించింది.
ఆన్‌లైన్‌లో దరఖాస్తు చేసే సమయంలో కొందరు ప్రభుత్వశాఖలో తాత్కాలిక ఉద్యోగం చేస్తున్న విషయాన్ని నిర్ధారించలేదు. అలాంటి వారి విజ్ఞప్తులపై వివరాలు సేకరించిన పంచాయతీరాజ్, గ్రామీణాభివృద్ధిశాఖ కమిషనర్‌ కార్యాలయం వాటిని తాజాగా సంబంధిత శాఖలకు పంపింది. వీరికి కూడా వెయిటేజీ మార్కులు కేటాయించాల్సి ఉంది.
ఈ సారి ర్యాంకులు..?
ఏపీ గ్రామ, వార్డు సచివాలయ ఉద్యోగ రాత పరీక్షల ఫలితాల్లో ఈసారి ర్యాంకులను వెల్లడించనున్నారు. ఈ 14 రకాల రాత పరీక్షలకు సంబంధించి వేర్వేరుగా అత్యధిక మార్కులు సాధించిన వారికి తొలి ర్యాంకు మొదలు చిట్టచివరి స్థానంలో మార్కులు తెచ్చుకున్న అభ్యర్థి వరకు ఈ ర్యాంకులను వెల్లడించనున్నట్టు సమాచారం.
జిల్లాల వారీగా రిజర్వేషన్లతో కూడిన ర్యాంకుల ఆధారంగానే ఆయా పోస్టులను భర్తీ చేయనున్నారు. 19 కేటగిరీలలో మొత్తం 16,208 ఉద్యోగాల భర్తీకి సెప్టెంబరు 20వ తేదీ నుంచి 26వ తేదీ వరకు 14 రకాల రాత పరీక్షలు జరిగిన విషయం తెలిసిందే. ఈ పరీక్షలకు రాష్ట్రవ్యాప్తంగా 10, 57,355 మంది దరఖాస్తు చేసుకోగా.. 7,69,034 మంది హాజరయ్యారు.
ఇక రాష్ట్రవ్యాప్తంగా 11,162 గ్రామ సచివాలయాలు, 3786 వార్డు సచివాలయాలకుగాను గత ఏడాది 1,26,728 ఉద్యోగాలకు గాను.. 1,10,520 పోస్టులు భర్తీ చేశారు. మిగిలిన 16,208 పోస్టుల భర్తీకి ప్రభుత్వం ఆదేశాలు జారీ చేయడంతో రాతపరీక్షలు నిర్వహించారు.
0 Komentar