Is Sleeping During Daytime Good or Bad?

 

Is Sleeping During Daytime Good or Bad?

మీకు మధ్యాహ్నం వేళ కూడా నిద్రపోవడం అలవాటా? ఇది ఆరోగ్యానికి మంచిదేనా?

రోజుకు రెండు సార్లు పడుకోవడం వల్ల ఆరోగ్యానికి నష్టమేమీ ఉండబోదని, దీనివల్ల ప్రయోజనాలు కూడా ఉన్నాయని పరిశోధకులు తెలిపారు.

రెండో సారి నిద్రపోయేవారిలో చురుకుదనంతో పాటు క్రియేటివిటీ పెరుగుతుందన్నారు.

రోజుకు కనీసం ఎనిమిది గంటలు నిద్రపోవడం ఆరోగ్యానికి ఎంతో మంచిదని నిపుణులు చెబుతారు. అయితే, చాలామంది ఇన్‌స్టాల్మెంట్‌లో నిద్రపోతుంటారు. అంతే.. రాత్రి కోల్పోయిన నిద్రను పగటి వేళ నిద్రపోయి కవర్ చేస్తారు. కొందరు త్వరగా పడుకొని త్వరగా లేచి.. అదే రోజు మధ్యాహ్నం మళ్లీ నిద్రపోతారు. మరి.. ఈ అలవాటు మంచిదేనా? రోజుకు రెండుసార్లు నిద్రపోవడం వల్ల ఆరోగ్యంపై ఎలాంటి ప్రభావం పడుతుంది? తదితర అంశాలపై ఇటీవల ఆస్ట్రేలియాకు చెందిన RMIT యూనివర్శిటీ కొన్ని పరిశోధనలు చేసింది. 

అధ్యయనంలో భాగంగా పరిశోధకులు రాత్రి నుంచి ఉదయం వరకు ఏకదాటిగా పడుకునేవారికి, రాత్రి కాసేపు నిద్రపోయి మధ్యాహ్నాం మళ్లీ పడుకునేవారి ఆరోగ్య పరిస్థితులను పరిశీలించారు. ఈ సందర్భంగా కొన్ని ఆసక్తికర విషయాలను తెలుసుకున్నారు. అవేంటో చూడండి మరి. 

రెండు సార్లు పడుకోవచ్చా?:

రోజుకు రెండు సార్లు పడుకోవడం వల్ల ఆరోగ్యానికి నష్టమేమీ ఉండబోదని, దీనివల్ల ప్రయోజనాలు కూడా ఉన్నాయని పరిశోధకులు తెలిపారు. రెండో సారి నిద్రపోయేవారిలో చురుకుదనంతో పాటు క్రియేటివిటీ పెరుగుతుందన్నారు. వీరు చాలా అప్రమత్తంగా వ్యవహరిస్తారు. ఈ కారణంతోనే కొన్ని దేశాల్లో పిల్లలను మధ్యాహ్నం వేళ నిద్రపుచ్చుతారు. అలాగే ఉద్యోగులకు కూడా నిద్రపోయే అవకాశం కల్పిస్తున్నారు. 

యాక్టీవ్‌గా ఉండాలంటే..: రోజంతా శ్రమించేవారు విశ్రాంతి కోరుకుంటారు. ఫలితంగా వారి శరీరం నిద్రావస్థలో ఉంటుంది. అది పనిపై ప్రభావం చూపుతుంది. దీంతో వారు చురుగ్గా ఉండలేరని పరిశోధకులు తెలిపారు. మధ్యలో కాసేపు కునుకు తీసేవారు.. నిద్రవస్థ లేకుండా యాక్టివ్‌గా ఉండగలుగుతున్నారని పేర్కొన్నారు. మధ్యాహ్నం వేళ నిద్రపోయేవారు తమ కుటుంబంతో కూడా చాలా చక్కగా వ్యవహరిస్తారని, నైట్ డ్యూటీల సమయంలో కూడా అలసట లేకుండా పనిచేయగలగుతారని వివరించారు. 

ఎంత సేపు పడుకోవాలి?: 

ఒకసారి నిద్రపోయేవారు కనీసం ఎనిమిది గంటలు నిద్రపోవాలని అంటారు. మరో రెండోసారి నిద్రపోయేవారు ఎంతసేపు నిద్రపోవాలనే సందేహం చాలామందిలో ఉంటుంది. అయితే, పరిశోధకులు ఈ విషయంపై స్పష్టత ఇవ్వలేదు. గత పరిశోధనల ప్రకారం.. రెండోసారి కనీసం ఒక గంట నిద్రపోయినా ఉత్సాహంగా ఉంటారు. అలాగే, రాత్రిళ్లు కేవలం 4 గంటలు మాత్రమే నిద్రపోయి ఉంటే.. మిగతా 4 గంటలు మధ్యాహ్నం వేళల్లో పడుకోవచ్చని మరికొన్ని పరిశోధనలు చెబుతున్నాయి. ఏది ఏమైనా సమయానికి నిద్రపోవడం ఎప్పటికీ మంచిదే. నిద్ర మంచిదే కదా అని అతిగా నిద్రపోయి కొత్త సమస్యలను మాత్రం కొనితెచ్చుకోకండి.

గమనిక: ఆరోగ్య నిపుణులు, అధ్యయనాల ప్రకారం ఈ వివరాలను అందించాం.