Vaibhav Suryavanshi (14-Year-Old) Scores Fastest Century (35 Balls) - Details Here - Leading website for AP and Telangana Teachers lesson plans, students projects Teaching Learning Materials

Vaibhav Suryavanshi (14-Year-Old) Scores Fastest Century (35 Balls) - Details Here

14 ఏళ్ల వైభవ్ సూర్యవంశీ - 35 బంతుల్లో వేగవంతమైన సెంచరీ – రికార్డుల వివరాలు ఇవే – హైలైట్స్ లింక్ ఇదే

====================

14 ఏళ్ల ప్రాయంలో ఈ బుడతడు మాత్రం మైదానంలో మంటలు పుట్టించాడు. అంతర్జాతీయ స్థాయిలో పోటీ, అత్యంత పోటీ ఉండే ఐపీఎల్ మ్యాచ్లో మేటి బౌలర్ల బౌలింగ్ ను ఊచకోత కోసి ఔరా అనిపించాడు. ఇతనికి పద్నాలుగేళ్లంటే నమ్మం అనుకుంటూ ప్రేక్షకులు సంభ్రమాశ్చర్యాలకు గురయ్యేలా బ్యాటుతో పెను విధ్వంసం సృష్టించాడు. అతడి పేరు వైభవ్ సూర్యవంశీ. మామూలుగా బాదలేదు ఈ రాజస్థాన్ రాయల్స్ చిన్నోడు. బౌలర్లపై నిర్దాక్షిణ్యంగా విరుచుకుపడుతూ.. సిక్స్లు, ఫోర్ల మోతతో హైలైట్స్ను తలపిస్తూ.. కేవలం 35 బంతుల్లోనే శతకం బాదేశాడు. ఐపీఎల్ చరిత్రలోనే రెండో అత్యంత వేగవంతమైన సెంచరీని నమోదు చేశాడు. ఫలితంగా 210 పరుగుల లక్ష్యాన్ని కూడా అలవోకగా ఛేధించి.. గుజరాత్ ను చిత్తు చిత్తుగా ఓడించింది రాజస్థాన్. వైభవ్ ఏకంగా 11 సిక్స్లు బాదేశాడు.

రాజస్థాన్ రాయల్స్ కు అదిరే విజయం. యువ సంచలనం వైభవ్ సూర్యవంశీ (101; 38 బంతుల్లో 7x4, 11×6) మెరుపు శతకం బాదడంతో ఆ జట్టు సోమవారం 8 వికెట్ల తేడాతో గుజరాత్ టైటాన్సును మట్టికరిపించింది. శుభ్మన్ గిల్ (84; 50 బంతుల్లో 5x4, 4x6), బట్లర్ (50 నాటౌట్; 26 బంతుల్లో 3x4, 4x6) చెలరేగడంతో మొదట గుజరాత్ 4 వికెట్ల నష్టానికి 209 పరుగులు చేసింది. వైభవ్తో పాటు యశస్వి జైస్వాల్ (70 నాటౌట్; 40 బంతుల్లో 9x4, 2x6) విరుచుకుపడడంతో లక్ష్యాన్ని రాజస్థాన్ 15.5 ఓవర్లలో 2 వికెట్లు కోల్పోయి అలవోకగా ఛేదించింది. ఈ ఐపీఎల్లో 10 మ్యాచ్ల్ లో ఓడిన రాజస్థాన్ కు ఇది మూడో విజయం. 9 మ్యాచ్లో గుజరాత్ ది మూడో ఓటమి.

ఐదు నెలల ముందు 14 ఏళ్ల కుర్రాడు ఐపీఎల్ వేలంలో కోటి రూపాయలకు పైగా రేటు పలికాడని తెలిసి ఆశ్చర్యపోయాం. పది రోజుల ముందు ఆ కుర్రాడు తొలి ఐపీఎల్ మ్యాచ్ ఆడుతూ ఎదుర్కొన్న తొలి బంతికే సిక్సర్ బాదడం, క్రీజులో ఉన్నంతసేపు ధనాధన్ షాట్లు ఆడడం చూసి అబ్బురపడ్డాం. ఇప్పుడా చిన్నోడు ఏకంగా సెంచరీ కొట్టేశాడు.. అది కూడా కేవలం 35 బంతుల్లోనే. సోమవారం నాటికి 14 ఏళ్ల 32 రోజుల వయసున్న ఈ కుర్రాడు.. ఐపీఎల్లోనే కాక మొత్తంగా టీ20 క్రికెట్లో శతకం సాధించిన అత్యంత పిన్న వయస్కుడిగా నిలిచాడు. ఐపీఎల్ చరిత్రలోనే రెండో వేగవంతమైన శతకం అతడిదే. ఈ రాజస్థాన్ రాయల్స్ ఓపెనర్ ధాటికి.. గుజరాత్ నిర్దేశించిన 210 పరుగుల భారీ లక్ష్యం చిన్నబోయింది.

====================